Knubbeltour noh Brügge 2010


zur Foto-Galerie bitte auf das Bild oben klicken !

Einmol em Johr stelle de Knubbelfründe unger Bewies, dat se sech och mieh als eine Ovend verdrage dun un fahre op Knubbeltour. Dis Johr ging et vum 25. bes 27. Juni noh Westflandern en dat schöne Städtche Brügge.

Sechzig Knubbelfründe trofen sech bei bester Laune un Sommerwedder an d’r Ülepooz. Noh däm Fröhstöck em Hutel Germania en Weiden ging et övver de A 4 Rechtung Westen. Su kome mer öm de Meddagszigg endlich em Seebad De Haan aan. Zor Begrößung jov et em Café an d’r Strandpromenad jet zo drinke un Belgische Waffele. Et wor e bissche wie em Urlaub, wann mer su op et Meer un dä blaue Himmel geluurt hät. En et Wasser gesprunge es zom Jlöck keiner, ävver op dä ein ov andere Plaat hät sech flöck d’r Sonnebrand angekündig. Doröm sin mer noh ner jode Stund flöck widder en d’r Bus gehöpp un wigger noh Brügge gefahre. Medden em historischen Stadtzentrum hatte mer met däm Novotel Brügge en schön Ungerkunf. Zom Ovendesse trofen sech de Knubbelfründe em Restaurant „Maximilian van Oostenrijk“, direkt nevven däm Beginenhof am Minnewater. Et Esse woodt o‘m Grillross övver däm offene Füür zorääch gemaat un hät allemole lecker geschmeck. Weil et Wedder ärg wärm wor un et an d’r fresche Luff einfach schöner es, hät sech dat Schmölzje ganz höösch noh Drusse verlagert. D’r eine fröher, d’r andere späder, sin de Knubbelfründe widder Richtung Hotel gewibbelt.

Et usgiebige Fröhstöck am nöhkste Morge kunnt mer em Sonnesching op d’r Terass ennemme. Em Anschluss han mer dann en kleinere Grüppcher met Föhrer Brügge erkundet. Et ging vum Beginenhof övver de köhle Liebfrauenkirche bes zom Maatplatz un Rothuus. Dat kunnte mer zom Avschluss sogar vun inne besichtige. Manch einer wor donoh vun d’r kulturellen Vielfalt övverwältigt un hät sech flöck e schön Plätzje em Stroßecafé gesöök. „Mer fahre op et Land“, hieß et dann am Ovend. Met däm Raddampfer „S.W. Lamme Goedzak“ ging et en genöglicher Fahrt övver d’r Kanal en et malerische Damme. Et gotische Rothuus moot noch flöck för en Gruppebild herhalde, bevör mer em Restaurant „Den Heerd“ met Aperitif op dä kleine Terass fründlich begröß woodte. Donoh kunnte sech all am fesslich engedeckte Desch nidderlooße. Satt un zofridde sin mer zo vörgeröckter Stund en d’r Bus gestiege un zoröck noh Brügge gefahre.

Dä Sunndag hät singem Name alle Ihr gemaht un uns met Sönnche pur bejröß. Wat künnt do besser passe, als en Grachtenrundfahrt durch Brügge? Vum Wasser us kunnte mer et Städtche en ungewohnter Perspektiv beluure. Zom Jlöck es dobei keiner övver Bord gegange, ävver et wor ärg knapp. De Junge hatte d’r größte Spass, wann sech uns zwei Böötcher ungerwähs en de Quer gekumme sin: do bliev kein Hemb drüsch. Als et gäge Meddag op Heim aanging, hät dä ein ov andere e Schlöfje em Bus gemaht. Em schöne Ooche stundt dann d’r letzte Programmpunk an. Et Restaurant “Am Knipp“ kom denne Knubbelfründe gerade rääch, öm em Biergaade bei lecker Kölsch und jet zo müffele en WM-Party zo fiere. Schleeßlich hät de Nationalmannschaff an däm Nohmeddag gäge England gespillt un zom Övverfluss och noch met 4:1 gewunne. Wie mer sech vörstelle kann, wor donoh op d’r Stroß d’r Düvel loss, su dat mer ööntlich Probleme hatte, övverhaup us Ooche eruszokumme. Ävver mer han uns brav en d’r Autokorso engereiht un woodte ganz höösch us däm Städtche gespölt. Zofridde un möd han mer en Stund späder widder d’r Dom erblick un kunnte an d’r Ülepooz uns Leevje en d’r Ärm nemme.

Mer sin ald gespannt, wat de Knubbelfründe en 2011 zosamme erläve dörfe. Nur suvill weed verrode: op Knubbeltour jeiht et em nöhkste Sommer noh Wien.