Knubbeltour noh Potsdam 2008

von Michael Sebus "Hülbeer"


zur Foto-Galerie bitte auf das Bild oben klicken !

Nä, wann dat dä Ahle Fritz gewoss hät, dat d´r zweite Knubbel vun de Kölsche Funke rut-wieß in ens freiwellig besöke deit, dann hätt hä sech vör Freud em Grav erömgedriht! Wie sech de Zigge ald ändere. Ävver immmer de Reih noh.

Dä zweite Knubbel wor ens widder ungerwähs em Oste d´r Republik. Uns Ziel heeß Potsdam un d´r Spreewald. En aller Herrjottsfröh trofe mer uns am Floghafe Köln/Bonn. Ohne Zweschefäll wore mer ald en gode Stund späder en Berlin-Tegel. Von do us gingk et direktemang mem Bus en d´r Spreewald. Dat es die Gägend, wo sech Has un Fuchs gode Naaach sage un unse Fründ <<Drievnäl >> em Bösch sing Unwese driev. Et eesch gingk et noh Lübben. Do han die Stollenwerks ehr Gurkeimperium. Unse << Feldschloot >> deit ald met nem opulente Fröstöck op uns waade. Zwesche Palette vun Spreewaldgurke un allerlei Gemös han mer dä eeschte Doosch gelösch un och jet gäge d´r Schless gedon . Usföhrlich han mer uns aangeluurt , wat d´r << Knollejupp >> un sing Famillich en Lübben opgebaut han.

Och unse Präsidöres << Laachduv vun d´r Ülepooz >> un unse neue Korpsadjudant << Backes >> wore resslos begeistert. Am späde Vürmeddag sin mer noh Schlepzig, em ungere Spreewald , opgebroche. He aangekumme, woodte op dä traditionelle Spreewaldkähn – vollgespick met Bier un Schabau – de Wasserwege un d´r Bösch erkundet. De Stemmung wor prächtig un selvs de Wildsäu han Reißaus genomme, als se uns kumme soche. Noh suvill fresche Luff , moote mer uns eesch ens stärke.

Alsu woodt Enkehr gehalde en d´r Spreewälder Privatbrauerei . Wie et en su nem Brauhaus üblich es gov et Bier bes zom Avwinke un e deftig Buffet. Su kome mer god gelaunt un gesättigt am fröhe Ovend em Steigenberger Hotel Sanssouci en Potsdam aan. Mänch einer hät sech noh däm enchecke jet op et Ohr gelaht un es eesch am nöchste Morge erwaach. Dä Ress hät de Hotelbar ov de örtliche Kneipe en Beschlag genomme. Am Samsdagvürmedag stundt uns grosse Schlössertour op däm Programm. Zoeesch en d´r Neue Palais. Vun do durch de Gääde vun Sanssouci bes zom Schloss Sanssouci. Mallich woren de Fööss am qualme un jlöcklich, dat se anschließend jet räste kunnte. Nor uns << Quetsch >> wor ärg zidderig. Hä hatt de Botz gestreche voll, dat dä << Ahle Fritz >> in bei dä << Lange Kääls >> rekruteere künnt. Zom Jlöck es Alles god gegange un su kunnt uns << Quetsch >> singe Knubbel des Ovends em Schloss Cecilienhof zom Galadinner begröße. Et wor ne unvergessliche Openthalt en däm Etablissement, wo schon d´r Churchill, d´r Stalin un d´r Truman getagt han. Ävver wat sin die Drei ald gäge << Laachduv >> , << Backes >> un << Feldschloot >> ?

Dä Sonndagmorje stundt em Zeiche vum << Gustav >>. Su heeß dat ahle Dampscheff met nem ömklappbare Uspuffrühr un em urahle Dieselmotor. Met däm Vehikel sin mer de Havel bes zom Wannsee eravgeschippert. Et gov satt ze Müffele un ze Süffele un vell ze sinn.

Bevör et dan widder Richtung Tegel gingk, han mer noch schnell ne Avstecher zo unsem << Angie >> Merkel gemaht. Leider wor et nit doheim. Ersatzwies han mer d´r Berliner Reichstag besichtigt. Unger fachmännischer Begleitung vun unsem

<< Gineral Quetschenbüggel >> , dä mer ungerwähs engesammelt hatte, sin mer dä Reichstag bes en de Spetz eropgeklomme. Wor dat ne herrliche Usbleck üvver Berlin. Dä Bundestagsavjeordnete un FDP Metglied Dr. Werner Hoyer hät uns dann noch koot en sing Fraktion engelade, öm uns Rede un Antwoot ze stonn.

Met denne interessante Endröck sin mer em Aanschluß widder noh Kölle jejöck.

Et wor en gelungene Knubbeltour die mallich god jefalle hät och wenn uns Avschiedsgeschenk , de Spreewaldgurke vum << Feldschloot >> , anstatt en Kölle om Düsseldorfer Flughafe stundte. Ävver nit nor mer, nä och die Gurke sin zom nöchste Knubbelovend, god en Kölle aangekumme.