Knubbeltour noh Emden 2007

von Michael Sebus "Hülbeer"
Zwesche Curry-Woosch un Matjes


zur Foto-Galerie bitte auf das Bild oben klicken !

Dä II. Knubbel hät sech dismol noh Ossfriesland opgemaht. Dat es do, wo Do hück ald sinn kanns wä üvvermorje ze Besögk kütt. Uns Reiseziel wor de Hafenstadt Emden.

Dat mer noh Ossfriesland enreise durfte wor garnit esu einfach. Ald vör 23 Johr han mer denne Ossfriese anlässlich uns Knubbeltour noh Bad Esens de PISA –Studie versaut , denn mer han domols beim Ossfriese Abitur jämmerlich versagt. Ävver se hatte Erbarme un leete uns trotzdäm kumme.

Su han mer uns am Friedag, däm 7. September pünklich öm aach Uhr en d´r Ülepooz getroffe. Noh nem deftige Fröhstöck vun unsem Ihremitglied Zizies, gingk et mem Bus en Richtung Nordsee. För flüssige Nahrung wor ausreichend gesorg- dank uns Fründe Mählsack un Jlöhwürmche – un su kome mer godgelaunt des Meddags en Emden aan.

Em Volkswagen - Werk vun Emden wodte mer ald erwartet. Mänch einer wör am leevste selvs aangereis öm sei ahl Jöckemobil gäge e neu Modell uszetuusche. Gingk ävver nit, deshalv han mer uns nor aangeluurt wie esu en Kess zesammejebaut weed. Mallich kunnt dobei beobachte, dat die Monteure för unsen Zeitlupe arbeide deite , domet mer alles besser metkräge kunnte. Dat Bess an dä Werksbesichtigung sullt noh Auskunft vun Informanten die Curry- Woosch zom Avschluß sin. Alsu han mer alles god un brav övver uns ergonn looße en dä Hoffnung op die Woosch. Mänch einer kunnt se jo och god verdrage noh all däm Schabau op d´r Faht . Ävver et woodt späder un späder un die Woosch kom nit. Irgendwann han mer dann geschnallt , dat se uns kein Curry-Woosch mih aanbeede. Dat wor secher de späde Rache för dat vermurkste Ossfriese Abitur. Mer han uns, bescheide wiemer nor ens sin , all selvs versorg un et es och keiner verhungert. Nor uns Quetsch hat av däm Ereignis esu jet wie en Curry-Woosch Syndrom.

Uns Hotel met däm schöne Name Uptaalsboom ( dat es esu jet wie d´r Freiheitsbaum) hät uns dann widder met dä Ossfriese versöhnt. He leetsechgod levve. Noh nem kleine Nickerche gingk et des Ovends noh Rysum, wat etwa su groß es wie ne Fleejeschiss op ner Landkaat. En däm Restaurant Rysumer Plaats gov et Matjes en alle Variatione un do bekanntlich Fesch schwemme muß, Bier bes zom Avwinke. Eesch als dä „Küstennebel“ optrog dämmerte et uns , dat et langsam zick wor op Emden aan ze fahre.

Nohdäm och de letzte Naaksühle widder god zo sech gekumme wore, gingk et am Samstagmorje noh Papenburg . He stund de Besichtigung vun dä renomeete Meyer-Werft öm Programm. Ald als mer do aankome, deit uns einer vun denne imposante Pött begröße. Beim Rundgang durch de Trockendocks bekome mer alle Facette vum Scheffbau ze hüüre un ze sinn. Dä ein ov andere leet sech för sing nöchste Kreuzfaht ald ens en Kajütt reserveere un jederein dä dobei wor , soch sech em Draum ald üvver et Meer schippern. Des Samstagsovend gingk et zom Galaessen en et „Hohe Haus“ noh Greetsiel. Dat Hafenveedel vun Greetsiel süht met singer kleine un schön restaureete Hüsjer us, wie en Kuliss em Hännesje Theater. Em Hafen vun Greetsiel litt Deutschlands größte Krabbenfischerflotte. Us däm Jrund gov et em „ Hohen Haus“ och widder vell fresche Fesch ze Esse. Unse „ Gineral Rhingroller“, dä jo schon en d´r janze Welt gegesse un gedrunke hät, wor voll des Lobes üvver de Qualität vun dä Köch.. Et gov nix ze nöttele. Dä Service wor perfekt un selvs dä Köbes, dä unse Rhingroller bedeent hatt wor us Kölle ze Huus. Hä deit sech immer öm unse Norbert erömdäue bes et rack us im eruskom: „ Sie sehen aus wie der frühere Oberbürgermeister von Köln“. „Richtig“ deite mer quiteere, „mer han dä bessserhaldenste Dubbelgänger vum Norbert Burger dobei“. „Schade“ deit dä Köbes sage , „ich habe gedacht er wäre es selbst“. Mer han dä Köbes späder opgeklärt un unse Rhingroller moot noch mänch Autogramm gevve.

Am Sunndagmorje wor nom Fröhstöck en Stadtföhrung durch Emden aangesaht. Unger dä fachkundige Leitung vun dä „ Frau Botterbrot“ kunnte mer uns ne Endruck üvver Land un Lück verschaffe un et dät mallich god sech jet de Fööss ze vertredde. Noh nem deftige Imbiss sin mer Richtung Kölle opgebroche. Domet och keiner met nem Hungergeföhl noh Huus kütt, han mer noch en Kaffeetafel em „Hotel-Restaurant Schloß Diepenbrock“ opdesche looße. He kunnte mer uns noch jet räste un och de Mannschaftsfotos scheeße. Nor uns Quetsch wor wigger jet aangekratz , denn hä wor immer noch op d´r Sök noh dä verpasste Curry-Woosch. Ävver mer sin secher , hä weed se bestemmp noch irgendwo finge...