Dr Vörstand vum 2. Knubbel meldt :  

Mer gratuleeere

       Hans Müllewitz "hät 'r keine"     

Ölligträger 2009

***********************************************************************************************************

Et Johr 2009 neig sech höösch singem Engk entgäge. Dat es de Zick ens widder Röckbleck ze halde op et verjangene Knubbeljohr met singer zahlriche Hühepunkte. Wat es hänge jeblevve ?

De Knubbelovende vum II. Knubbel woren allemol stemmungsvoll un bes op d´r letzte Platz gefüllt. Et gov ööntlich Jrund ze fiere. Ov Gebootsdäg, Beförderunge ov us luuter Spass aan d´r Freud. Em II. Knubbel wor immer jet loss. Besonders erwähnenswäät wor unse Knubbelovend em Juli. Pünklich zor Feriezick han mer ne Usflog en et schöne Neffelbachtal zor Burg Bergerhausen noh Kerpen – Blotzem jemaht. Op Enladung vun unsem Gineralpossmeister >> Knollejupp << un singem Filius >> Feldschloot<< han mer ne wunderschöne Ovend unger freiem Himmel verbraht. Et woodt vell jejuuz un jelaach. Als Üvverraschungsgass, hät uns et Fussisch Julche met ehrer Leeder noch jet Partystemmung op de Terrass jedäut. Trotz leckerm Kölsch un däm ein ov andere Schabau es keiner en d´r Wassergrave jefalle ov vum Feldschloot en et Verlies gewurfe woode.

Uns Fess met Fraulück han mer em Mai en d´r Ülepooz gefiert. Unger däm Motto „Oranje Boven“ hatte mer zom holländische Ovend engelade. De Ülepooz wor rut -wieß - blau dekoreet un volljestopp met Utensilie wie Leuchtürm, Milchkanne , Schöfjer, Feschernetze un noch vell mih Krom. Uns Gäss komen passend engekleid en Spetzehäubcher, Ossfriesenerze , Fescherhemb , Hollandcloks ov Jummistivvel . Stilgerääch gov et dozo Heineken Bier, Genever un e holländisch Buffet.

Un dann kom sei! De Künnigin hüchspersönlich wor Erschiene um unsem Knubbelfess d´r richtige Jlanz ze verliehne. Majestätisch richtete Künnigin Angelika vun Sülz zo Klettenberg fründliche Wööt an ehr Knubbelvolk. Och ehre Prinzjemahl, wat zofällig unse Senatspräsident Wasserwoch es, moht derweil de Schnüss halde. Bei su huhem Besök goven sech selsverständlich en janze Hääd Stars us unsem Nohbarland de Klink en de Hand. Speziell för uns Fraulück han mer noch ens d´r Heintje oppoleet. D´r Joopi Heesters es uns ald dubbelt erschiene. Kei Wunder, dä lääv jo och för Zwei. D´r Vader Abraham hät uns met singer Schlümpf e Ständche gebraht un zom gode Schluss kom noch Frau Antje us Holland met ehrer Haschbröder , die uns >> Wasserwoch << un d´r >> Klaus Franz << noch ens aan ehr Jugendsünde erinnere deite. Flankeet woodt die janze Schwitt vun ner stattliche Funkewach, die met Hollandgurke präsenteete. Bei all däm Quatsch verginge de Stunde wie em Flog. Kootöm et wor ne herrliche Ovend vun däm noch vell verzällt woodt.

Dä ultimative Hühepunk vum Knubbeljohr es allemol uns Knubbeltour. Am letzte Aujusswochenengk ging et op Sök noh dä jemeinsame Woozeln vum rheinische Fastelovend – noh Mainz - .

God gestärk met nem deftige Fröhstöck em Buch, sin mer des Vürmeddags opgebroche. De eeschte Etappe endete ävver ald en Bonn. He wullte mer unse Bundespräsident en d´r Villa Hammerschmidt besöke. Wie dä hoot dat d´r II. Knubbel em Aanflog es, hät hä Rießus genomme. Trotzdäm wor et en singem Zweitwohnsitz janz amüsant. Noh nem Avstecher em ahle Wasserwerk hät uns dä >> Knocheflecker << jet godes op d´r Desch vum Johanniter – Spidol gebraht. Dat Esse wor wirklich lecker, ovschüns jederein hofften , dat hä dat Esse nit us däm OP metgebraht hat.

Am fröhe Nohmeddag hatte mer uns Ziel erreicht. Zor Freud vum janze Knubbel hatte die Mainzer em Stadtpark, dä direktemang nevven unsem Hotel log , dat janze Wochenengk ne Wingmaat opgebaut. Kaum hinge de Pluute em Schaaf , woren de Knubbelfründe om Wingmaat en alle Himmelsrichtunge verstreut. Dat Ovendesse woodt em Kasemattenkeller vum Novotel Mainz engenomme. Zor Jlöcksilligkeit vun unsem Korpsadjudant >> Backes << hatte mer im als Empfangskommitee d´r Mannschaftsbus vun Bayer 04 Leverkusen vör de Pooz jestallt. Die Leverkusener han janz bedröppelt us d´r Wäsch jeluurt, als mer dann >> mer stonn zo Der FC Kölle << aanjestemmp han. Ävver de Stemmung kunnte die uns och nit vermiese. Nohdäm mer god jemüffelt un jesüffelt hatte, komen als Üvverraschungsgäss >> De Schnorreswackler << vum Gonsenbacher Carnevals Verein. Vun denne künnt sech manch kölsche Jrupp en decke Schiev avschnigge. Eijens för d´r II.Knubbel hatte die Junge e speziell Jesangsprugramm zesamme jestallt. Met ehrem a-capella – Gesang han se uns bejeistert. Wä em Anschloß noch nit genog gehürt un gesinn hatt, kunnt noch d´r Wingmaat bes en de fröhe Morjestunde besöke.

Am foljende Dag stund de Besichtigung en d`r Sektkellerei Kupferberg aan. Dat Kribbelwasser vum Kupferberg wor en wellkummene Avwechslung zo däm janze Wing vum Vürdag. Weil unse Knubbelfründ >> Jlöhwürmche << och noch Jebootsdag hatt, han mer der ein ov andere Stoppe stippe looße. Zo unsem große Galaesse am Ovend woren Allemann widder ööntlich erus jeputz un god opgelaht. Noh nem Sektempfang op d´r Terrass vum Favorite Parkhotel gov uns d´r Spellmannszog vun d´r Füsilier Garde Mainz e Ständche. God enjestemmp ging dann zom Vier-Gänge-Menue . Zweschedren gov et noch en Enlage vum Kinderballett d´r Füsiler Garde. Gäge Mitternaach wore mer dann am Engk öm anschleeßend noch e klein Verdauungsspazeergängelche üvver d´r Wingmaat maache ze künne. Als dä dann och de Stöhl un Desch hujeklapp hät, han mer uns aan d´r Hotelbar noch jet de Fööss vertrodde.. Pünklich öm sechs Uhr morjens han mer däm Personal dann de Mügelichkeit gegovve sech jet op et Ohr ze läge. Mänch einer hät dann noch jet de Minibar sorteet öm d´r Sonneopgang su richtig schön geneeße ze künne.

Leider gov et am Sonndag dann e paar Verluste . Die kunnte mer ävver verkrafte ( Entschuldigung Laachduv un Backes !) un su es d´r Ress vum II.Knubbel noh däm Fröhstöck zo ner Erkundungstour durch dat historische Mainz opgebroche. Jitz wood och däm Letzte klor, dat dä eeschte Mainzer ne Kölsche jewäs sin muss. Wat et zwesche Kölle un Mainz för Parallele gitt es nit ze üvversinn. Ov Römerzick, Rhing ov Dom fass Alles wie en Kölle .Selvs zwesche denne Wöötche Fastelovend un Fassenacht gitt et mih Üvvereinstemmung wie zwesche Kölsch un Altbier. Nor dä Fastelovendjroß Helau han se sech leider bei däm größte Dörp en NRW avgeluurt. Wahrscheinlich es dä Mainzer Fastelovendsbeauftragte met d´r Bimm en Haldestell zo wigg gefahre un hätt jemeint hä wör noch en Köln – Roggendorf . Noh äll denne Endrück vun Mainz sin mer zom Meddagesse en et Ömland noh Harxheim opgebroche. He han mer dann noh Gutsherrenaat noch ens e deftig Buffet un jede Menge Wing verputz. Et Sönnche dät laache un mallich hät singe Meddagsschlof op d´r Veranda vum Weingut Ressler jenosse. Dat wor ne richtig schöne Usklang unser disjöhrige Knubbeltour.
Ävver noh d´r Tour es vör d´r Tour. Alsu freue mer uns ald op e nöchste Johr. Dann geiht et noh Brügge.