Met unserem neue Knubbelführer Schavu un dem ahle Knubbelföhrer Jöckpolver jingk et dis Johr op Knubbeltour noh Trier. De älteste Corpsgesellschaft fuhr en de älteste Stadt vun unsem Land. Mer drage ne schöne rude Rock, un die han de Hellige Rock. Un do jedem Funk der Rock hellig es, han mer en Wallfahrt met Exerzitie gemaat, quasi Knubbelexerzitie.

1. Übung:
Wade, ob der Bus kütt, Kenneliere

Et jov genoch Zick jede zehnmol zo bejrösse, domit mer se all kann tun mer se üvverall widderfinge kunnt, wenn einer verlore jingk. Mer sin met 66 Ölliche jefahre, dozo komen unsere Ehrenkommandant Et Stätzge vun d’r Ülepooz, dä Enkels Pitter und ä Backes Jens Egg vum Vörstand.

2. Übung:
Kartbahn fahre

Et eesch troken mer nom Nürburgring, hand at Museum besök und en Häät vun uns sin Kartbahn jefahre. De Ahle sosse op der Sick un han de Cheerleaders markiert, wat uns düchtig jeholfe hätt. Jewonne hätt der Wilfried Müllewitz vörm Tobias Kreiten un Mike Böhme.

3. Übung:
Kirche luure – Heiliger Rock

Em Dom han mer der Hellije Rock et eesch angeluurt, mer woren richtig noh dran. Mer künnt fromm wäde: eine Rock ohne Noht, ein Kirch – alle Funke, alle Knubbele, zosamme.

4. Übung:
Vun der Spiritualität zu Spirituosen

Ovends han de Funke-Piljer nit mih de Beldere ävver de Plaate jebütz. Zweschendurch kräch einer ne musikalischen Anfall un wullt uns kölsche preussische Historie met „Berliner Lieder“ dokumenteere. Dat hätt der Knubbelführer jot hin jekräge. Mer han em e Rümpche met Salz jejovve, un der hätt dann irjendwo anders zo Engk jesunge.

5. Übung:
Wade op der OB

Am nöhkste Dach sin mer stief staats en et Simeonsteff jejange. Der Bäbbel hätt jet vun der Römere un andere Saache jeschwadt, dat se en der Porta Nigra Lück enjemort ha nun esu. Su kunnte mer et Wade besser hinger uns bränge. Dann kom der OB Schröer in „Grümmeljrösse“ un hätt vill vun Kölle un vun Luxemburg verzallt. Ävver dä Bäbbel hätt uns emmer widder jesaht, dat mer en Trier wöre un för sing janze Verzällcher han se em dann en Kett öm dä Hals jehange, die de ahle Kreiten jemaht hätt. Zweschendurch kom och der ahle kölsche OB, Gineral Ringroller, aanjeflitz, wat uns hätzlich jefreut hätt.

6. Übung:
Grosser Wallfahrtsweg zur Mosel. Wahljedanken

Nohm Rothuus leefe mer durch de Stadt un han uns ahl Stein anjeluurt, Basilika, Kaiserthermen. Donoh hätt der Bäbbel uns durch janz Trier jeschleif, der Heinze Deck hat Blose an der Ziehe (eijross), Neuwahle wooten jefordert. Dann han mer en nem kulinarischen Second Hand Lade Schnitzel för die Welt jetestet. Die Schnitzel han jesieg, de Zäng han verlore. Üvvrijens han mer jehoot dat zwei Funke, die naaks e Alarmjeföhl hatten, fass de Zäng vertuusch han.

7. Übung:
Goldener Kuss, Enthaltsamkeit

Des ovends sin mer op e Weingut jefahre, han deftig, jot un met vill Wing jejesse. Jekumme es och extra de Weinkönigin vun Trier, et Kerstin. Unse ahle Präsidöres kunnt kaum vun ihr losse, hätt se emmer widder jebütz. Dä wohre Sieger vun dem Kartbahnrenne wor hä,un der Knubbelföhrer moot emmer nor zoloore.

8. Übung:
Waade ob der Gustl kütt

Mer daachten schon der kütt üvverhaup nit mih, jetz waden mer op ne Knubbelovend.

9. Übung:

Am nöhkste Dach sin mer en Brodendorf met alle Knubbelfründe spazeere jejange un han in der Nöh Meddag jejesse. Die han uns so jän jehatt, dat se sech vill Zick jelosse han.

10. Übung:
Alle Umwege führen noh Steinfeld – Schlusssegen vum Pater Schirmdrötche

Dann mahte mer en jrosse Eifelfahrt. Kaum en Stroß han mer usjelosse. Der ärme Pater Schirmdroht un unsere Präsidöres Laachduv vun dr Ülepooz mooten lang op uns wade. Ävver alles, wat die Laachduuv jetzt mäht, kann er als Resultat dieser Missionsreise deklareere: Stein för Stein wird erneuert im Feld der Funken, eben Steinfeld. Hä quasi „allein gestallt“, hätt der Schirmdroht versorg, und ä hätt sech jefreut.

En der Kirch litt och der Hl. Hermann Josef, der Pattühm vum Knubbelführer. Der wor och ens Koch, dann Uhrmächer, Sakristan un es üvver 90 Johr alt jewode. Och en jrosse Orjel met ener janze Häd von Piefe han se. Mer woß ja nit, wie mer all en der Kirch wore, wo mieh Piefe wore.

En Knubbeltour maachen de Funke domet se sech besser kenneliere könne. Dann weiss mer, wer einem jefällt ov nit, wo mer jet dran dun muss ov net. Su wor dat jet wie Exerzitien, en richtige Übung, och för Fastelovend. Hätzlichen Dank dem Hein, Mick, Karl, Hermann Josef, Dirk un Olaf, die alles su schön enjefädelt han un uns müngchesmoß serviert han.